Brandewyn, kuierwyn
2010-07-23 22:25
Die Karoo in die winter het vir my ’n spesiale bekoring, daardie yskoue nagte en die heerlike sonnige dae met ’n byt in die lug vroegoggend en laatmiddag.
Sjef Francois Ferreira klim agter die potte in vir hitte en hou ’n bottel brandewyn naby …
Die yskoue nagte kan mos baie beter word voor ’n vuur of in ’n kombuis met ’n Aga-stoof, lekker kos en een van ons land se ikone, brandewyn.
Die genot van brandewyn en kos is vir baie mense ’n vreemde kombinasie. Hoekom, vra ek een aand aan tafel, is almal sku om brandewyn met kos te geniet; dit word van dieselfde druif as wyn gemaak, dus behoort dit goed te werk.
My gasheer en gasvrou het maar skepties gelyk en toe besluit ek om die volgende aand ’n proesessie aan te bied.
Storm die volgende oggend dorp toe en stuur ’n gebedjie op dat ek iewers in die dorp ’n goeie potstill of twee kan kry.
Anders as ’n vermenger-brandewyn is ’n potstill gemaak om op sy eie met ’n bietjie ys of water gedrink te word en so kan jy die ware siel van die brandewyn waardeer.
Wonder bo wonder kry ek toe, effe weggesteek, ’n bottel Nederburg Solera, Klipdrift Gold en vyf jaar oue Joseph Barry Cape Pot Still.
My gebede is verhoor en ek kon daardie aand bewys dat brandewyn in en saam met kos werk.
By die huis kook ek ’n storm los en dié aand sit ons aan vir kos en brandewyn.
Ek sit toe die drie bottels op die tafel en laat almal elke brandewyn op sy eie proe.
Eerste ruik jy dit so 5 cm van die neus, dan in die glas en daarna neem jy ’n klein teugie en laat dit oor jou tong glip.
Dan gooi jy ’n teelepel water by. Die brandewyn maak oop soos ’n dahlia om jou op ’n rit van geure te neem: Neem nog ’n teug en jy kan nie glo dit is dieselfde brandewyn nie.
Die kos word op die tafel gesit, die brandewyn word weer geskink en almal geniet ’n aand met brandewyn en kos.
Van Ryn’s-distilleerdery buite Stellenbosch bied ’n vleisbord van organiese spesialiteitsvleise van Steve Jeffery aan.
Hy het drie vleise gekies (bauernspeck, pancetta en bresaola) om drie brandewyne van die distilleerdery te komplementeer.
Vir handelsure en toertye, besoek gerus www.vanryn.co.za.
Borsstuk met heuning-en-brandewyn-masalasous
Genoeg vir 4
45 ml olie
900g borsstuk ( brisket ), in repe
250ml bief-ekstrak
2 uie, in dun skywe gesny
sout en peper na smaak
Heuning-en-brandewynsous
125 ml heuning
125 ml water
100 ml brandewyn
60 m l garam masala
2 knoffelhuisies, fyngedruk
Verhit die olie in ’n drukkoker en braai die borsstuk-repe bietjie vir bietjie totdat almal geseël is.
Skep die vleis uit en soteer die uie in die olie tot sag. Voeg weer die vleis by. Geur na smaak en giet die ekstrak oor die vleis.
Plaas die deksel van die drukkoker op en verseël. Laat kook vir 30 minute. Skakel die plaat af en laat die druk verminder totdat die pot oopgemaak kan word.
Kombineer die sousbestanddele, giet oor die borsstuk en laat prut vir omtrent 10 minute.
Sit voor met gekookte aartappels en groente.
Italiaanse varknekbredie
Genoeg vir 4-6
1 kg varknek, in blokkies gesny (2 cm x 2 cm)
60 ml olyfolie
2 knoffelhuisies, fyngekap
15 ml vars gekapte salie blare of 7,5 ml gedroogde salie
sout en peper na smaak
vars gerasperde neutmuskaat na smaak
750m l rooiwyn
750ml vars tamatiepulp
2 blikkies rooi bone, gedreineer
Verhit die olie in ’n pan en braai die knoffel en salie. Voeg die varknek by en geur met sout, peper en neutmuskaat.
Sodra die vleis bruin is, voeg die wyn en tamatiepulp by en laat kook oor lae hitte totdat die wyn en tamatiepulp met 50% ingedamp het – dit behoort tussen 20 en 25 minute te duur.
Net voor opdiening, voeg die bone by, verhit deur en sit voor met varsgebakte brood en ’n lekker brandewyn.