Vrystaat is voos, maar soustrein rol voort

Die voorbladberig, Vrystaters keelvol vir slaggate (Volksblad, 12/11/09) verwys.

Die LUR vir polisie, paaie en vervoer, mnr. Thabo Manyoni, het onlangs aan die DA in die wetgewer erken dat 63% van alle teerpaaie en 90% van alle grondpaaie in die Vrystaat swak tot uiters swak is.

Terwyl hierdie stand van sake heers het die nuwe Vrystaatse premier, mnr. Ace Magashule, R14,3 miljoen aan sy inhuldigingspartytjie en geselligheid ná sy openingsrede in die wetgewer bestee. Net daarna het hy nog R11 miljoen bestee aan luukse Mercedes-Benze vir sy uitvoerende komitee.

Daar word steeds talle ander geleenthede deur die provinsiale regering geborg.

Ons provinsie het die swakste gesondheidsorg in Suid-Afrika, ons het die swakste paaie in die land, ons provinsiale departemente het volgens die ouditeur-generaal die meeste onreëlmatige uitgawes van alle staatsdepertemente, en ons munisipaliteite sukkel om basiese dienste te lewer.

Die regering kan nie verwag dat belastingbetalers die luukse leefwyses van die regerende politieke elite onbeperk gaan onderhou terwyl dieselfde politici beweer dat daar nie geld is vir basiese dienste en infrastruktuur nie.

Die ANC moet besef dat hierdie stand van sake bydra tot politieke onstabiliteit, wat baie gevaarlik is vir ’n jong demokrasie soos Suid-Afrika.

Roy Jankielsohn

DA-leier in die Vrystaat