Herstel eers reg en orde om slagting om te keer

Die artikel “Stop padslagting in SA só” (VB 25/01/2012) verwys.

Almal betrokke by verkeer en verkeersveiligheid in die land is op die grens van histerie oor die aantal ongelukke op ons paaie per jaar, verál oor die Desembervakansies. En dit is heeltemal geregverdig dat hulle so voel. ’n Slagting is dit voorwaar, met die aantal beseerdes nie eens bekend nie.

Ons sal die slagting op die paaie nie omdraai voordat reg en orde in die algemeen in die land drasties verbeter nie. Ek probeer verduidelik:

Die verlaging van die snelheidsperk na 100 km/h gaan beslis help, maar nie naastenby die uitwerking hê wat die minister in gedagte het nie.

Die toepassing van die snelheidsperk op 120 km/h soos dit tans is, is glad nie doeltreffend nie, as ’n mens in ag neem hoeveel voertuie by jou verbyjaag as jy teen 120 km/h ry.

Die blouligbrigades wat funksioneer en opgemerk word in alle provinsies, stel die voorbeeld van hoe om nie te ry op ons paaie nie. (Baie dankie aan die Wes-Kaap wat hulle wil verbied om te jaag na ’n vergadering, of ’n laat afspraak!)

Verwyder moordenaars permanent van die pad wat oor rooi verkeersligte jaag. Gaan stop gerus by Du Plessislaan op pad na Bainsvlei of menige ander verkeersligte in die stad en vergewis uself.

Verwyder moordenaars van die pad wat dink wit soliede sperstrepe is ’n aanduiding watter kant Kaapstad of Gauteng is en oor die strepe ry asof dit nie bestaan nie.

Kry die skare verkeersbeamptes (wat begin Januarie 2012 voor Woodland Hills se hekke gestaan het) op die paaie om die wet toe te pas en mense toe te sluit wat oor rooi verkeersligte en soliede sperstrepe ry.

C. Kampff

Bloemfontein