Hartseer oor UV God die trekpas gee

Met ’n gevoel van onbehae en hartseer het ek as oud-Kovsie kennis geneem van die onlangse besluit of voorstel van die leiding van die Universiteit van die Vrystaat se raad om God uit die amptelike universiteitsleuse te verwyder.

Eers moes reeds die band met Nederland en die Afrikaner se afkoms ontken word omdat dit skielik die universiteit se Afrika-karakter sou bedreig. Na Oranje het nou ook God die trekpas gekry. Ek is dankbaar my kollegas by die teologiese fakulteit, onder wie prof. Piet Strauss, stem nie saam met die besluit nie. Hulle is reg.

Harvard se amptelike leuse is: Veritas Christo et Ecclesiae. Maar Harvard is deesdae skaam vir Christus en gebruik gewoonlik nog net “veritas”. Bedink egter dat Harvard steeds die volledige leuse op sy amptelike seëls gebruik.

Princeston se amptelike leuse is: Dei sub numine viget. Met God se hulp gaan dit goed, en dit gaan tans baie beter met Princeston as met die Vrystaat.

Hoekom leer ons nie by Oxford nie? Elke Dinsdag, Donderdag en Vrydag word middagete in die grootste kollege van Oxford met onder meer die volgende woorde (in tweespraak) begin:

“Blessed be God in his gifts. And holy in all his works. Our help is in the name of the Lord, who has made heaven and earth. May the name of the Lord be blessed, from this time and for evermore... And we ask you that we, rightly using these Your gifts to Your glory, may be brought with them to immortal life. Through Jesus Christ our Lord, Amen.”

Laat die Vrystaat se universiteitsraad amptelik begin bid vir pres. Jacob Zuma en die ANC in Jesus Christus, ons Verlosser, se Naam.

Net soos amper al die mense binne die universiteit se voedingsgebied bid vir hulle kos in Jesus se naam.

Het die Lig van die wêreld wat ons juis weer met Kersfees geëer het, nie self gepraat van skaam wees vir Hom en sy woorde nie?

Kom ons bid saam met Yale: “Stuur, Heer, U lig en waarheid weder! (Ps 43:3).”

Asseblief universiteitsraad en alumni, verwerp hierdie “Goddelose” voorstel.

Prof. Benno Zuiddam

Blackstone Heights

Australië