G’n dowe-skool in Bfn

Ek wil graag uitvind hoekom daar nie in Bloemfontein ’n skool vir dowe kinders is nie.

Of hoekom kan hierdie kinders nie saam met ander in gewone skole skoolgaan nie, met die wete daar is vir hulle onderwysers wat hulle tolke kan wees en kan help met gebaretaal. Hoekom moet hulle in afsondering skoolgaan as hulle eendag ’n werk kry waar almal, glo my, nie doof gaan wees nie.

In die Vrystaat is daar ongeveer 800 dowe kinders. Hierdie kinders moet hulle gesinne verlaat om skool te kan gaan in ander provinsies en stede.

Wanneer gaan die Vrystaatse Onderwysdepartement ’n plan maak? Hier is wel ’n Lettie Fouché-skool en ’n Martie du Plessis-skool, maar nie een van hulle kan ’n gehoorgestremde persoon help nie.

Is dit so moeilik om so ’n skool in Bloemfontein te stig? Daar is soveel studente in Bloemfontein wat studeer om eendag gehoorgestremde kinders te kan help, maar daar is nie vir hulle poste beskikbaar by skole nie.

Ouer van dowe dogter

Bloemfontein