Gaan Christelike geloof in Afrika oorleef?

Ds. Hannes Noëth, predikant van die Gereformeerde kerk Kimberley se Brandpunt “Roepingsbewus die toekoms in” (VB, 6/02) vind ek amusant. Hy het nodig om nog ’n paar boeke te lees.

Ds. Noëth, vra op Colesberg by die gastehuise waar museumstukke nou bewaar word vir ’n afskrif van navorsing en ’n proefskrif wat ’n predikant geskryf het insake die oorsaak en ontstaan van die “Dopper-storie.” Dit gaan oor gebeure in die omgewing Colesberg, Middelburg en Steynsburg toe trekboere oor die Oranjerivier begin weiding soek het en afgeslote van nuwe ontwikkeling begin raak het.

Die geestelike worsteling van ons huidige tyd, het my ook vir drie jaar ’n draai by die Enkel Gereformeerdes (Doppers) in twee gemeentes laat maak. By die tweede gemeente is ek vriendelik uitgestoot omdat ek (weens higiëniese redes) nie, soos Sola Scriptura dan vereis, die nagmaalsbeker wou gebruik nie.

Waarom twyfel ds. Noëth, met sy standpunt insake Sola Scriptura, of sy nageslag sy kerkverband sal deel?

Ek stem saam met Slagoffer van Kaapstad, se brief “Sondes van die vaders” (oor regstellende aksie) in dieselfde Volksblad. Hoekom?

Een belangrike feit uit die Afrikaner-geskiedenis staan vas: Sy onvermoë om andersdenkendes, anderstaliges en anderskleurige Godgeskape mense te akkommodeer. Generaal de Wet het gesê hy sal eerder met sy volk op ’n ashoop sit voordat hy met volksvreemdes in dieselfde raadsaal sal sit.

Watwou, ds. Noëth, die Afrikaner sit nou op die ashoop van sy onaanpasbare voorgeslagte buite die raadsale! Die vraag is nie of die Enkel Gereformeerde Kerk in SA gaan voortbestaan nie, maar in watter land?

Of as daar hoop is: Onder watter bevolkingsgroep in SA. Die groter vraag: Gaan die Christelike geloof in eenheid en in praktyk oorleef in Afrika?

Teoloë moet ernstig huiswerk doen en die groter geheel van God se werkinge op aarde raaksien. In die eindtye sal mense, volke en nasies geoordeel word, so verstaan ek die Bybel.

Afrika benodig nie meer kerke nie, maar leraars op gesinsbesoeke en dissipels op straat en in raadsale.

Hou op om tyd te mors met irrelevanthede, kyk na die groter geheel en skep arbeiders om die oes in te samel.

Eie Tyd se Denker

Parys