DA maak Kaapstad werk

Ek was vir ’n volle maand in die Kaap, Bloubergstrand. Ons het oor die 5000 km gereis en die Wes-Kaap deurkruis. Nie een slaggat of lekkende waterpyp nie, en geen opgehoopte vullis en vuil, beboste sypaadjies nie!

Orals is netjies, leesbare geverfde padtekens, straatname en borde. Sigbare polisiëring is aan die orde van die dag in stede, dorpe en veral op strande.

Sypaadjies is pragtig versorg. Die parke is ’n lus vir die oog.

By elke winkelsentrum is private sekuriteit. Geen “aangestelde bedelaars” wat jou bestorm om jou kar “op te pas” of om jou trollie te gryp nie!

As ’n voertuig op een van die paaie of snelweë breek, is bystand binne minute daar om die voertuig te beveilig en om die motoriste te waarsku van die voertuig in die pad.

Een ding staan soos kop bo water in die Kaap uit: Die DA-regering steel nie die mense se geld nie. Jy kan dit duidelik sien in die stad en omgewimg se strukture, paaie en munisipaliteite.

Draai die krane oop en jy’t lieflike skoon water om te drink. Toerisme- aantreklikhede word soos goud opgepas en in stand gehou.

Mense in die Kaap is trots op hulle provinsie. Dit is duidelik op elke gesig leesbaar.

Nie soos hier in Kimberley wat veronderstel is om ’n historiese stad te wees, maar waar alles besig is om te vergaan en te verval nie!

Gaan gerus Kaap toe en kyk hoe dit daar lyk. Kaapstad werk!

Estelle Barnard

Kimberley