Boete is hier verseker

Met blydskap en vreugde het ek en my eggenote in Desember vir ons kinders in die Kaap gaan kuier.

Wetende dat ons ná elke rit Kaap toe ’n spoedboete van Beaufort-Wes af te wagte kan wees, of jy nou vinnig of stadig deur die dorpie ry, was ons dié keer ekstra noulettend daarop om die spoedgrense te eerbiedig, het eintlik stadiger gery as die aanbevole spoed.

By ons terugkoms het ons nogal onder mekaar gespog dat ons hierdie keer die spoedkamera definitief vrygespring het, omdat dit nêrens nodig was vir ’n fotosessie nie.

Tog het die ongelooflike gebeur. Die wit koevert van Beaufort-Wes was gister op my lessenaar met ’n netjiese boete weens spoedoortreding!

Kan enigiemand vir my raad gee en sê hoe ’n mens dit regkry om deur Beaufort-Wes te beweeg sonder ’n spoedkaartjie?

Hoe kan ek bewys ek is onskuldig as ek glo dat ek nie die wet oortree het nie?

Ek wens daar was ’n manier om nie deur daardie ellendige plekkie te beweeg nie.

Kobus Groenewald

Steynsrus