Karverkope wys resessie is aan’t wyk

Dit wil voorkom asof motorverkope in Suid-Afrika besig is om kop op te tel.

Die toename van 18% in die verkope van nuwe voertuie in die eerste twee maande van 2010 teenoor dié in Januarie en Februarie verlede jaar is ’n bemoedigende teken dat Suid-Afrika besig is om sy eerste resessie in 17 jaar af te skud – en dit is besonder goeie nuus vir die sakegemeenskap, sê die uitvoerende hoof van McCarthy, Brand Pretorius.

“Die motorbedryf word allerweë as ’n noukeurige barometer van sakevertroue en aktiwiteit in die werklike ekonomie beskou, gevolglik was die verkope van nuwe voertuie in Februarie verblydend,” sê hy.

Volgens die syfers van die Nasionale Vereniging van Voertuigvervaardigers van Suid-Afrika (Naamsa) is daar in Februarie altesame 39 312 nuwe voertuie van die hand gesit.

Hoewel dit net effens beter was as die verkope in Januarie vanjaar, was dit ’n aansienlike 20,5% beter as die prestasie van die voertuigbedryf in Februarie 2009.

Die grootste verbetering was in die passasiersvoertuigsektor.

Hoewel daar in Februarie 3,7% minder passasiersvoertuie verkoop is as in Januarie, was die Februarie-syfer ’n betekenisvolle 27,5% hoër as in dieselfde maand verlede jaar.

Pretorius reken dit is ’n bemoedigende teken.

“Verlede maand se afset van 26 009 passasiersvoertuie is verdere getuienis dat daar ’n besliste opwaartse neiging in die mark is, hoofsaaklik aangevuur deur vlootaankope.

Motorverhuringsmaatskappye se aankope met die oog op WB2010 het ook sake aangehelp.

Die gedempte vraag van private kopers was egter teleurstellend.

“Met die uitsondering van die mediumswaar-handelsvoertuigmark was daar gesonde toenames in verkope in al die ander handelsvoertuigsektore teenoor die afset in Februarie verlede jaar,” sê Pretorius.