Die nuwe baba-Prius

2011-12-08 08:05

Met die Tokio-motorskou se wiele wat tans aan die rol is, is dit Toyota se nuwe Prius C wat heelwat aandag ontlok.

Die Prius C, of Aqua, soos dit in Japan heet, is beslis die mooiste Prius tot nog toe en is ’n kleiner weergawe van die groter Prius wat ook in Suid-Afrika beskikbaar is.

Toyota sê die nuweling is tegnies in staat om tot soveel as 35 km ver te kan ry vir elke een liter petrol wat gebruik word danksy die hulp van die elektriese motor.

Die nuwe Prius C behou sy kernwaardes van ’n ruim bagasiebak en sitplek vir vyf volwassenes om daarvan ’n volwaardige gesinsryding te maak net soos sy groter ouboet.

Aandrywing kom in die model van ’n 1500-enjin en ’n nuwe hibriedstelsel wat sodanig verpak is om beter hanteringseienskappe aan die wa te gee omdat die swaartepunt nou laer is.

Die enjin en elektriese motor sal ook in die komende Yaris-hibried ingespan word.

Toyota Suid-Afrika kyk tans daarna om die Prius-reeks plaaslik uit te brei, maar dit sal waarskynlik nie op korter termyn geskied nie.

• ’n Interessante konsep in die Toyota-stal is die FCV-R (Fuel Cell Vehicle – Reality & Revolution). Die wa is 4.7 meter lank en maak gebruik van waterstof vir aandrywing.

Toyota reken dat ’n waterstof-aangedrewe voertuig uit sy stal teen 2015 gereed sal wees.

Die brandstofsel is aan die onderkant van die spesiaal ontwerpte bakwerk aangebring en vier mense met bagasie kan hulle in die FCV-R tuismaak. Die model se reikafstand is ongeveer 700 km.


Toyota se waterstofaangedrewe FCV-R-konsep.  Gesels saam op Facebook en volg Beeld op Twitter.