Nampo een geleentheid wat produsente nie wil misloop

Die Nampo-oesdag en die landbougemeenskap van Suid-Afrika neem vanjaar weer hul plek in om die wêreld van landbou van 18 tot 21 Mei ten toon te stel.

Met die 2010-tema, Sien die wêreld van landbou, as inspirasie, is die meer as 630 uitstallers gereed om die onderskeie fasette van kommersiële landbou aan te pak.

Meganisasie-uitstallers gaan voortbou op hul metode van virtuele demonstrasies – wat sedert verlede jaar by hul uitstalruimtes op Nampopark aangebied word.

“Die oesdag is daardie een geleentheid in die jaar wat produsente nie wil misloop nie, want dit is ’n een-tot-een-kontakgeleentheid én ’n samekoms van alle relevante partye betrokke in landbou,” het mnr. Jub Jubelius, voorsitter van die Nampo-oesdag, gesê.

Produsente kry die geleentheid om hul persoonlike wêreld van landbou te meet teen die jongste tegnologie en boerderykennis wat in die mark beskikbaar is. “Dít maak van die oesdag ’n uitsonderlike besigheidsgeleentheid vir enige produsent,” het hy bygevoeg.

Hy het ook genoem dat insetverskaffers wat in vorige jare nie uitgestal het nie, vanjaar heelhartig terug is omdat hulle opnuut die waarde van die oesdag besef.

Die groeiende belangstelling deur oorsese uitstallers verseker vanjaar ’n groot afvaardiging van Argentinië, sowat vyf Amerikaanse uitstallers en nuwe produkte vanuit Australië wat uitgestal word.

Wat die veevertoning betref, word ’n handvol nuwe veeras-uitstallers verwag wat nog nie voorheen op die oesdag uitgestal het nie.

Maar in die leefwêreld van die landbouer gaan dit nie net oor ysters, tegnologie en bemarking nie. Graan SA, wat die Nampo-oesdag aanbied, verskaf oudergewoonte ’n blik op die ontspanningskant van die lewe:

Die 4x4-hindernisbaan staan en dreun behoorlik in voorbereiding op ’n praktiese demonstrasie van produkte wat in die mark beskikbaar is. Die demonstrasies is elke dag om 11:00 en 15:00.

Die skoner geslag kan regskuif vir ’n inspirerende program. Dit word daagliks in die Sampi-saal aangebied, terwyl ’n modeparade elke oggend om 11:00 in die Fanie Ferreira-saal gehou word.

As ’n immergewilde deel van die oesdag word boere se wenplanne op die boerepatente-kompetisie uitgestal.

Graan SA se lede kwalifiseer vir gratis toegang en eksklusiewe parkeerplek. Lede word uitgenooi om by die Graan SA-ledelokaal te kom besoek aflê.

Kaartjieverkope

Kaartjies kan by die hekke gekoop word teen R60 per persoon (Dinsdag, Donderdag en Vrydag) en R70 per persoon (Woensdag). Besoekers kan van middel April vooraf kaartjies koop by uitgesoekte Engen-depots en Senwes Village-winkels.

Volledige inligting oor Nampo 2010 is te sien op die webwerf by: www.nampo.co.za.