Kundiges bespreek talle uitdagings, voorbeelde op Safex-kursus

Die departement landbou-ekonomie van die Universiteit van die Vrystaat (UV) bied in Maart weer ’n Safex-kursus aan waar die basiese werking van die Safex-landboumark deeglik en met praktiese voorbeelde deur kundiges bespreek sal word.

Prof. Johan Willemse, bestuurder, sê graanpryse het die laaste maande skerp gedaal, met verskeie nagevolge. Die bestuur van prysrisiko is een van die groot uitdagings om graan winsgewend te produseer.

Dit is vir graanboere noodsaaklik om hul prysrisiko te bestuur terwyl veeboere ook hul voerpryse suksesvol kan bestuur. Die gebruik van prysbestuur-instrumente sal op die kursus in diepte bespreek word.

’n Handleiding word beskikbaar gestel en aan die einde van die eendagkursus behoort kursusgangers ’n goeie werkbare kennis van die Safex-landboumark te hê, lui die verklaring.

Willemse sê die kursus is van waarde vir almal betrokke in graanproduksie en graanbemarking. Dit word toenemend gevind dat boervrouens betrokke raak by bemarking en prysverskansing omdat boere nie in die dag tyd het daarvoor nie.

In Amerika is baie saaiboere se vrouens verantwoordelik vir die bemarking en prysverskansing en word gevind dat hulle dit in baie gevalle suksesvoller as die boere self doen.

Selfs veeboere kan die Safex-landboumark gebruik om hulle teen stygende voergraanpryse te verskans. Hierdie aspekte sal ook aandag kry.

Belangstellendes moet hul plekke vir die kursus op 12 Maart bespreek by mnr. Dirk Strydom by dstrydom@ufs.ac.za of 051-401-7036 of me. Jolandi Kruger by 051-401-2826.