Werkloses trek voordeel uit projek

BETHULIE. – Spanne werkers in oranje oorpakke het sedert Februarie ingespring om die strate in dié munisipale gebied skoon te maak. Die spanne sal ook daarvoor verantwoordelik wees om die sykante van die nasionale verbindingspaaie van obstruksies skoon te maak.

’n Woordvoerder van die munisipaliteit het gesê die werk word gedoen as deel van die regering se uitgebreide program vir openbare werke (EPWP) se padinstandhoudingprojek. Die projek is ’n projek van die kantoor van die Vrystaatse premier en word deur die provinsiale regering gefinansier.

Die munisipaliteit op Bethulie is slegs ’n toesighouer van die projek om te verseker dat die doelwit, naamlik die skoonmaak van die gebied, bereik word. Die werkskeppingsprojek het ook ten doel om te probeer om inwoners van Bethulie te bemagtig sodat hulle enige plek in die land met ander kontrakteurs vir tenders kan meeding. Die driejaarprojek het in begin Februarie vanjaar begin en sal jaarliks hernu word na gelang van die gehalte van werk wat die kontrakteur en sy span gelewer het.

Daar is 5 spanne, 215 werkers, aangestel. Vier spanne werk op Bethulie en een op Jagersfontein.

Die werkers is gekies volgens ’n stelsel waar die gemeenskap gevra is om afskrifte van hul identiteitsdokumente te verskaf, waarna dit volgens geslag en ouderdom gesorteer is. Die kontrakteurs word dan voorsien van hierdie lyste vanwaar hulle hul werkers kies volgens die riglyne wat deur die EPWP bepaal is.

Elke span het ’n eienaar en ’n terreintoesighouer.

Volgens die woordvoerder sluit verantwoordelikhede van die werkspanne in om die dorp se strate en leivore skoon te maak, asook die regmaak van paaie, slaggate en die verwydering van enige obstrukies langs die paaie.

Die munisipale woordvoerder noem verder daar is min werkgeleenthede op Bethulie en dat die projek daarom ’n groot geleentheid is om werkloses se lewensomstandighede te verbeter deur werk aan hulle te verskaf en glo ook dat dit die dorp se ekonomie sal bevoordeel.

- Volksblad