VVLU-lede kry kykie agter kliniek-skerms

BETHULIE. – ’n Groep lede van die plaaslike tak van die Vrystaatse Vroue-Landbou-unie (VVLU) het onlangs meer uitgevind oor die werking van die Lephoi-kliniek op die dorp.

Mev. Christelle Jacobs, sameroeper van die VVLU, het die personeel van die kliniek gekomplimenteer oor hoe mooi skoon die kliniek is en oor die personeel se vriendelikheid. Suster Anneke Olivier het die vroue meer vertel van die werksaamhede en diens aan die publiek van Bethulie, Lephoi, Cloetespark en die plase in die distrik.

Daar is vyf susters en die klem is op psigiatrie, kraamgevalle, kinders, ’n mobiele eenheid, MIV en antiretrovirale middels. Wat medisyne en voorskrifte betref, is die susters beperk tot skedule 2. Hulle ondersoek pasiënte, skryf medisyne voor, waarna die pasiënte die medisyne by die kliniek se apteek kry. Wanneer dit buite die bevoegdheid van die susters val, sal die geneesheer medisyne voorskryf.

Elke pasiënt moet elke ses maande sy/haar voorskrif van die geneesheer by die hospitaalapteek op Smithfield ingee.

Verpleegkundiges ondersoek daagliks pasiënte en verwys hulle, indien nodig, na die dokter. Pasiënte mag nie self ’n afspraak met die dokter maak nie. Dr. Kosie le Roux, distriksgeneesheer van Trompsburg, besoek die kliniek op Maandae en doen deeglike ondersoeke. Die stelsel laat toe dat die geneesheer ’n maksimum van 30 pasiënte per dag kan spreek.

Pasiënte meld hulle aan en registreer hulle by ontvangs en nuwe pasiëntlêers word daar geopen. Die grootste uitdaging is met menslike hulpbronne, aangesien daar nou slegs een administratiewe klerk is wat alle ontvangs- en administratiewe aangeleenthede moet hanteer.

Op sommige dae word tussen 120 en 150 lêers getrek wat weer geliasseer moet word en die liasseerstelsel wat gebruik word, word bepaal deur die jaar waarin die pasiënt geregistreer is. Weens die personeeltekort, veroorsaak dié volume somtyds oponthoude en pasiënte word versoek om geduldig te wees.

X-strale word op Smithfield geneem. Vir enige skoon beenbreuke sal die pasiënt tot Dinsdag of Donderdag, die dae wanneer die diens beskikbaar is, moet wag. Sou dit ’n slegte breuk wees, word die pasiënt verwys.

’n Tandarts is op Donderdae van 10:00 tot 14:00 by die kliniek beskikbaar vir basiese dienste soos trek of stop van tande. Die eerste 15 pasiënte word gehelp.

Op Donderdae is daar ook ’n dieetkundige, fisio- en arbeidsterapeut by die kliniek beskikbaar.

Pasiënte word daagliks op weeksdae na Smithfield en Bloemfontein vervoer, met ’n maksimum van sewe per dag. Die vervoer vertrek om 05:00 en word gereguleer met ’n toestemmingsbrief van die kliniek.

’n Psigiater besoek Smithfield op die laaste Donderdag van elke maand. Voordat ’n pasiënt verwys word, word ’n volledige evaluasie gedoen en ’n verslag deur ’n klinieksuster opgestel. Die ambulansdienste het ’n beheerpunt op Bethulie en kan by 101-777 gebel word.