Sterre bekoor op aand
2011-07-27 17:06
GOLDEN GATE. – “My Afrikaans is nie vlot, maar ek probeer. Gee my drie jare dan sal ek mooi vlot Afrikaans praat!”
Só het die Vrystaatse LUR vir toerisme, ekonomiese en omgewingsake, mnr. Mxolise Dukwana, Vrydagaand op die derde Sterre-en-Planete-aand by die Golden Gate-hotel die gaste gegroet.
Dukwana het gesê sy departement is by hierdie astro-toerisme-projek betrokke omdat omgewingsbewaring vir die departement belangrik is.
“Ons wil graag die Vrystaat as ’n leidende provinsie vestig wat sy natuurlike hulpbronne bewaar. Ons het nie die see nie, maar ons het helder lug wat mense kan waardeer en ons moet almal saamwerk om dit so te hou.”
Benewens die helder lug wat in die winter by uitstek geskik is vir sterrekyk, het die provinsie ook ’n ryk geskiedenis wat ook toeriste kan trek.
Die Afrikaanse Handelsinstituut (AHI Vrystaat), die Boyden-sterrewag en RSG span saam om hierdie geleenthede aan te bied. Die eerste twee geleenthede is in die Vredefort-koepel en die Tussendieriviere-reservaat by Bethulie gehou.
Die volgende Sterre-en-Planete-aande word op 26 en 27 Augustus in die Sandveld-natuurreservaat aan die Vrystaat-kant van die Bloemhofdam 35?km van Hoopstad gehou.
- Volksblad