Stem só vir jou gunstelingdorp

HOËRSKOOLLEERLINGE van Volksblad se lesersgebied in die Vrystaat en Noord-Kaap kan in vanjaar se Volksblad-Toerismedorp van die Jaar-kompetisie wen deur foto’s van hul dorpe in te stuur.

Hierdie foto’s word dan op Facebook geplaas en die fotograaf van die foto met die meeste likes elke week, wen R250 met komplimente van PWC, mits hy of sy natuurlik ook vir sy of haar dorp gestem het in die SMS-kompetisie.

Mense wat net per SMS stem, kan ook wen. Weekliks word ’n naweek met komplimente van Forever Resorts Gariepdam weggegee vir een gelukkige leser.

Lesers het weekliks tyd tot die Maandag om 10:00 om seker te maak hul stemme tel vir daardie spesifieke dorp se uitslae.

Die wendorp wat ná verdere beoordeling in September aangewys word, ontvang minstens R45000, asook R20000 om die wenmakietie op die dorp aan te bied.

Hierdie pryse is met komplimente van die borge – die Sentrale Universiteit vir Tegnologie (SUT), Vrystaat se Skool vir Toerisme, Gasvryheid en Sport, PWC, Capitec-bank en die AHI-Vrystaat. Volksblad-Kontrei gee wye mediablootstelling aan die projek en die wendorp.

Die vennote gaan ook saamspan om ’n bord by die wendorp op te rig wat sal aankondig dat dié dorp die kompetisie in 2011 gewen het.

Om te stem is maklik. Enigiemand wat sy of haar stem vir ’n plattelandse dorp in die Vrystaat en Noord-Kaap wil uitbring, kan deelneem. Die drie stede in die Vrystaat en Noord-Kaap, Bloemfontein, Kimberley en Welkom, kwalifiseer ongelukkig nie vir die kompetisie nie.

Die vorige twee jaar se wenners, Marquard en Gariepdam, mag ook nie aan die kompetisie deelneem nie.

Stem vir u dorp deur ’n SMS na 45527 te stuur. Begin u boodskap met Volksbladdorp gevolg deur die naam van die dorp waarvoor u wil stem, asook u naam en kontakbesonderhede. Dit moet dus só lyk: Volksblad dorp Kakamas Piet Pompies 082-123-4567. Elke SMS kos R1,50 en daar is geen beperking op hoeveel keer iemand mag stem nie.

Hoërskoolleerlinge moet bloot ’n foto neem wat volgens hulle ’n uitstaande eienskap van hul dorp uitbeeld, dit aan Volksblad stuur en hul vriende dan aanmoedig om op Facebook vir hul foto’s te gaan stem.

Stuur jou hoëresolusiefoto aan MJLourens@Volksblad.com. Skryf in die onderwerpveld Toerismedorp en maak seker dat jou naam, jou skool se naam en die skool se telefoonnommer in die e-pos is. Al die foto’s wat Volksblad teen die Donderdag om 12:00 bereik het, sal teen 13:00 op Volksblad-Kontrei se Facebook-blad geplaas word.

Mense het dan tyd tot Maandag om 10:00 om vir hul gunstelingfoto’s te gaan stem deur bloot op die like-knoppie te kliek.

- Volksblad