Pak SA se eie pelgrimstog aan

TROMPSBURG. – Droom jy al jare om iets te doen wat jy as onmoontlik beskou? Soos om die Camino de Santiago te stap. Hierdie pelgrimstog in Spanje strek oor 780 km en die meeste van ons is óf te onfiks, óf te bang, óf te platsak, óf dalk is dit net ’n gebrek aan tyd wat jou weghou.

Suid-Afrika bied egter sy eie pelgrimstog. Hierdie een is egter net vir vroue. Altesaam 16 vroue kan 10 dae lank in die Kalahari gaan stap. Dink net, net jy, jou denke en die natuur. Na verneem word, is dit ’n vernuwende ervaring soos min. Jy word fisiek, psigies en geestelik uitgedaag tot jou beste. Hierdie tog is 301 km lank, dus heelwat korter as die Camino.

Vanjaar vind die staptog van 2 Julie tot 13 Julie plaas. Die vroue gaan in gastehuise tuis en alle etes word voorsien.

Elke vrou moet slegs haar dag se water en versnaperinge met haar saamdra. Daar is nou vroue van Kaapstad en Gauteng wat die tog meemaak.

Die skrywer van hierdie berig is die enigste Vrystater wat dit wil aanpak en beplan om haar op Upington by die groep aan te sluit. Sy ry met ’n leë motor en sou baie graag iemand wou hê om saam te ry en saam te stap.

Daar word nie van punt A na punt B gestap nie, maar daar is daaglikse roetes wat besoeke aan die Augrabies-waterval, Riemvasmaak en die verlore stad insluit. Kakamas en Keimoes word ook besoek.

’n Professionele toerleier is die leier van die groep en sy vrou stap ook saam. ’n Volledige oefenprogram en ander inligting word voorsien.

Enigiemand wat belang stel, bel Alexander by 082-783-5785 of 051-713-7044.