Nuwe hospitaal beplan
2011-05-25 06:02
GARIEPDAM. – Die onlangse aankondiging dat hier ’n private hospitaal gebou gaan word, is met opwinding en dankbaarheid ontvang.
Verskeie inwoners sê dat juis in die jaar waarin die dorp die Volksblad-Toerismedorp van die Jaar is, kry hulle die groot geskenk om ’n eie hospitaal op die dorp te kry.
Gesondheidsorg in die Suid-Vrystaat was nog altyd ’n probleem, veral omdat die naaste provinsiale hospitaal op Smithfield en die naaste private hospitale in Bloemfontein is.
Die aankondiging is ’n maand gelede deur mnr. Marcell Mellet gedoen. Mellet is die ontwikkelaar van die nuwe aftreeoord op die dorp en sou aanvanklik net ’n mediese sentrum vir die oord gebou het.
Tydens die beplanning het Mellet besef dat daar in die Suid-Vrystaat ’n groter behoefte aan gesondheidsorg is en het toe by die departement van gesondheid vir ’n lisensie aansoek gedoen om ’n private hospitaal te bou en te bedryf.
Aan die einde van Maart is toestemming verleen om ’n private hospitaal te bou wat in die eerste fase uit 22 sub-akute beddens en 2 akute beddens sal bestaan.
Mellet sê in die finale fase sal daar geriewe vir 22 akute beddens, kraamgeriewe en ’n teater wees.
Die private hospitaal sal dan in die behoeftes van die aftreeoord, sowel as die dorp en omliggende distrik, kan voldoen.
In die eerste fase sal daar spreekkamers, ondersoekkamers, ’n apteek en ’n noodprosedure-kamer vir noodgevalle wees.
Aangesien Gariepdam langs die N1 geleë is, sal daar ook geriewe vir ambulansdienste en ’n stabiliseringseenheid wees. Mellet sê die hospitaal maak ook voorsiening vir ’n tandarts en arbeids- en fisioterapeutkamers.
Hy is nou in gesprek met verskeie hospitaalgroepe en ambulansdienste om die gespesialiseerde mediese dienste te lewer.
Die hospitaal sal bekend staan as die Gariep- Private Hospitaal en daar is reeds met die eerste grondwerke begin. Mellet beplan om die hospitaal teen die einde van 2012 in bedryf te stel.