Matriekklas kuier saam ná 50 j.
2010-05-04 22:11
BETHULIE. – ’n Halfeeu nadat hulle gematrikuleer het, het 12 van die 22 leerlinge in die 1960-matriekklas op Bethulie reünie gehou.
Van die groep het van so ver as Nelspruit, Hermanus en Pretoria gereis vir die geleentheid. Vier van die enigste vyf meisies in die klas het ook die naweek meegemaak. Die verrigtinge het Vrydagaand begin met ’n geselligheid in ’n plaaslike gastehuis, Saterdag het hulle ’n inligtingsessie gehad by me. Trudie Venter wat gereeld toeriste meer oor Bethulie vertel en leer, waarna hulle ’n onthaal in ’n ander gastehuis op die dorp bygewoon het. Hulle het Sondagoggend ’n kerkdiens bygewoon, waarna hulle vir oulaas saamgekuier het saam met een van die destydse klasmaats, mnr. Fanie van der Walt op sy plaas, Kapteinskraal.
Mnr. George Steytler, wie se pa destyds die skeinat-onderwyser was, het die reëlings gehanteer. Die feit dat die groep tien jaar gelede bymekaar gekom het om hul 40ste reünie te vier het daartoe gelei dat hulle mekaar hierdie keer maklik herken het. Sover vasgestel kan word, is vier van die klasmaats oorlede, terwyl twee van hulle nie opgespoor kon word, en vier ander nie die geleentheid kon bywoon nie.
Iets interessants omtrent die klas is dat, op een of twee na, almal verder gestudeer en grade behaal het. Die ander het goed presteer op hul eie gebiede.
- Volksblad