Historiese museum op Parys herleef

Die Parys-museum is ná jare se toestaan, stof vergader en verwaarlosing, weer vir die publiek oopgestel.

Die gebou, wat in 1904 as landdroskantoor opgerig is en een van die oudste geboue op Parys is, is later ook as poskantoor gebruik.
Verskeie ander instansies soos die destydse Barclay’s, Rooi Kruis, Oranje-Vrouevereniging (nou Vrystaat-versorging in Aksie) het die gebou gebruik. Tot in 1976 het die gebou die munisipale kliniek en gesondheidsafdeling gehuisves.

In die munisipale begroting van 1981-’82 is voorsiening gemaak om die gebou as ’n museum in te rig. Die museum is twee jaar later geopen en is in l993 deur die Raad vir Nasionale Gedenkwaardighede tot nasionale gedenkwaardigheid verklaar.

Weens ’n gebrek aan geld is die museum se deure in 2005 gesluit. Dit was ’n groot verlies vir Parys, ’n dorp met ’n ryke geskiedenis, ’n dorp wat vanjaar al 134 jaar oud is.

’n Paar komiteelede het probeer om die deure Saterdae vir twee uur oop te hou, maar dit was nie suksesvol nie, aangesien die uitstallings verwaarloos was en feitlik geen dokumentasie beskikbaar was nie.

Die afgelope aantal maande was daar egter soveel belangstelling in die geskiedenis van Parys en was dit duidelik dat die gemeenskap ’n behoefte aan ’n museum het. Sonder enige geld of hulp van die Ngwathe-munisipaliteit was dit egter nie moontlik nie.

Twee inwoners van Parys, mev. Iris Andrew en haar dogter me. Muriel Green, het besluit om ’n konsert te reël om geld bymekaar te maak vir die museum. Die konsert was so ’n groot sukses en daar was soveel belangstelling dat die bestaande komiteelede nuwe moed geskep het. Die komitee bestaan uit 14 lede, meestal sakelui van die dorp.

Die museum is op 19 April vir die publiek oopgestel en rekordgetalle besoekers besoek daagliks, veral Saterdae, die museum. Toegang is gratis, maar die skenkingsblik lewer groot verrassings op, almal is begeesterd en dra ruimskoots by.

Andrew, wat daagliks, vrywillig en sonder enige vergoeding in die museum werk, sê daar is nog baie te doen en baie dokumentasie en ou foto’s moet geklassifiseer en bewaar word. Die uitstallings is opgeknap en herrangskik en sy en haar dogter doen moeite om die museum toeganklik vir die besoekers te maak. Sy tree ook as gids op.
 
Die museum kan, met hulp van die sentrale regering, en met kundige en professionele kennis, ook om die klem op die Vredefort-koepel te plaas, met groot vrug as ’n belangrike toeriste-attraksie van die dorp aangewend word.

Besoekers kan daagliks, behalwe Woensdae, van 10:00 tot 15:00 en Saterdae van 09:00 tot 13:00 die museum besoek.