Groot dag kry toe sokkerkinkel

BETHULIE. – Mev. Anne Kitschoff van Huis Uitkoms op die dorp het verlede week ’n heerlike verrassing gekry met die viering van haar 94ste verjaardag.

Sy vertel aan die gaste wat haar verrassingspartytjie bywoon, dat sy teen die middag van 8 Junie in haar enigheid gedink het dat dit jou wrintieswaar die slegste verjaardag was wat sy nog ooit gevier het, maar dat “dinge in ’n minuut kan verander”!

Dit is inderdaad hoe blitsig sy van plan moes verander toe opwindende dinge vinnig begin gebeur het.

Haar dogter, Bethulie se staatsaanklaer mev. Anne Pretorius, haar kleindogter, mev. Anne (“klein Anne”) van der Vyver van Bloemfontein, en laasgenoemde se seuntjie, Eduan, het vir haar ’n verrassingspartytjie gereël waar die sewejarige Eduan, haar jongste agterkleinkind, spesiaal vir haar op die viool gespeel het.

Dit was egter nie die einde van die opwinding nie. Die uitvoerende burgemeester van die Xhariep-distriksmunisipaliteit, mnr Mongi Ntwanambi, sowel as Bethulie se burgemeester, mnr. Xolile Matwa, albei boorlinge van Bethulie, het spesiaal van Trompsburg af deurgery om haar te kom gelukwens en ’n pragtige geskenk saamgebring.

As teenvoeter vir die koue en in die gees van die sokker, het sy heerlike kombersies, asook ’n lekker warm opgestopte Suid-Afrika-sokkerbaadjie gekry.

Sy het juis ’n bietjie koud gekry en kon daar en dan die kombersie inwy en oor haar bene gooi, terwyl Ntwanambi haar met deernis gehelp het om die warm baadjie aan te trek.

Ouma Anne het dadelik in die 2010 WB-gees ’n groot Bafana Bafana-ondersteuner geword, terwyl die teenwoordiges besluit het al wat sy nog kortkom, is ’n hoed en ’n vuvuzela!

Haar twee ander dogters, Ellen en Elma, en hul mans kon ongelukkig nie op Bethulie wees vir die partytjie nie.