Gehalte-verblyf belangrik
2011-07-27 17:06
- Artikelopsies
- Deel
- Kry Volksblad op
Volgens die jongste Suid-Afrikaanse Toerisme-sakeoorsig wat vroeg in Junie bekend gestel is, het binnelandse toerisme in 2010 met ongeveer 8% gedaal. Mense wat vroeër baie met vakansie gegaan het, trek nou die gordel stywer en oor die algemeen word ’n afname in besettingsyfers in die huisvestingsektor ondervind. Daar heers selfs ’n prysoorlog in byvoorbeeld Kaapstad tussen hotelle en gastehuise met hotelle wat hul tariewe verlaag na wat die gastehuise vra.
Op die platteland word soortgelyke kompetisie en daling in besettingsyfers ondervind. Hoe dus nou gemaak om besettingsyfers konstant te hou en in die mededingende omstandighede groei te toon?
Gastehuise en die plaaslike hotel is meestal die ruggraat van ’n klein dorp se toerismebedrywighede. Dit is die toeris se kontakpunt met die plaaslike gemeenskap en die ervaring wat die toeris daar het, gaan sy/haar houding teenoor die dorp meestal bepaal. Dit is nie ongewoon dat wanneer mense met mekaar oor ’n dorp gesels, hulle hul ervaring oor huisvesting bo-aan die gesprekslys plaas nie.
Waarde vir geld en uitstekende dienslewering is twee van die belangrike pilare waarop ’n suksesvolle gastehuis rus. Niemand wil buitensporige pryse vir substandaardverblyf betaal nie.
Verder is die platteland ook vir sy gasvryheid bekend. Indien die besoeker nie tipiese gasvryheid in die dorp se huisvestingsektor ervaar nie, gaan sy terugvoer oor die dorp na die negatiewe kant neig. Karaktervolle huisvesting, bekostigbare pryse, eg plattelandse gasvryheid en unieke maaltydervaringe is waarna die besoeker soek. Dit is dus belangrik dat produkeienaars besef hul standaarde moet hoog wees en bly – anders gaan die kompetisie hul besigheid afrokkel.
Vind dus gereeld uit wat gaste se ervaring was, slaan ag op kritiek en maak werk daarvan.
Deur te weet wat toeriste ervaar en op die kennis voort te bou en te verbeter, kan jou onderneming groei toon en groter markaandeel wen.
- Johan Hattingh is ’n dosent aan die Skool vir Toerisme, Gasvryheid en Sport aan die Sentrale Universiteit vir Tegnologie (SUT), Vrystaat.
Kriteria
DIE kriteria waarvolgens die finale drie dorpe beoordeel word, is:
- Beskikbaarheid, gehalte en voldoende padaanwysers na die dorp;
- Beskikbaarheid, gehalte en voldoende toerisme-aanwysers op die dorp;
- Bestaan van doeltreffende toerisme-inligtingsentrums (sentrums, vulstasies, kiosks);
- Beskikbaarheid van toerisme-inligting ná ure;
- Gehalte van infrastruktuur;
- Gehalte van toerisme-trekpleisters en toepaslike inligting daaroor;
- Algemene netheid van dorp;
- Beskikbaarheid van netjiese huisvesting;
- Beskikbaarheid van gegradeerde huisvesting;
- Beskikbaarheid van vervoerstelsel na Bloemfontein;
- Sake-ure van restaurante, kroeë, geriefswinkels, ensovoorts;
- Bestaan en funksionering van ’n toerisme-forum;
- Bestaan en funksionering van ’n sakekamer;
- Algemene vlak van diens by supermarkte, geriefswinkels, ensovoorts;
- Beskikbaarheid van ’n webwerf;
- Netheid van parke en oop erwe;
- Gehalte en sigbaarheid van laaisones, geenparkeerplek-gebiede, ensovoorts;
- Netheid van parkeersirkels en eilande, byvoorbeeld wit en geel strepe;
- Toeganklikheid vir mense met gestremdhede by kernattraksies;
- Algemene stand van openbare dienste soos mediese, polisie-, veiligheid- en nooddienste;
- Die gehalte van die tien topdorpe se uitstallings tydens die toerismekongres in Bloemfontein;
- Die kennis en geesdrif van personeel by inligtingskantore op die dorpe;
- Deelname van inwoners in die kompetisie;
- Betrokkenheid van munisipaliteit en private sektor;
- Die beskikbaarheid en gehalte van uitdeelstukke en brosjures.
Pryse
Die wendorp in 2011 se kompetisie ontvang ’n minimum van R45?000,
asook ’n borgskap van sowat R20?000 vir die makietie op die dorp.
Die borge se bydraes is soos volg:
- Sentrale Universiteit vir Tegnologie (SUT), Vrystaat, se Skool
vir Toerisme, Gasvryheid en Sport – R15?000.
- PwC – R15?000. PwC borg ook die weeklikse Facebook-kompetisie
waarin leerlinge R250 kan wen en is die amptelike ouditeur van die
kompetisie.
- Capitec-bank – R15?000.
- AHI-Vrystaat – Die makietie op die wendorp ter waarde van
R20?000.
- Volksblad-Kontrei – Mediablootstelling aan die
projek en die wendorp.
Signwrite van Bloemfontein borg die bord by die wendorp wat sal
aankondig dié dorp het die kompetisie in 2011 gewen.
- Volksblad