Biblioteekgebou se 30 jaar gevier
2011-06-22 09:35
- Artikelopsies
- Deel
- Kry Volksblad op
VREDE. – Vriende van die Vrede-biblioteek het onlangs saamgekom om die 30-jarige ingebruikneming van die huidige biblioteekgebou te vier.
Me. Jenny Wessels, ’n oudinwoner van Vrede en destyds toonaangewende kultuurleier op die dorp, het as raadslidvrou in die vroeë 1980’s ywerig gewerk om hierdie praggebou vir die gemeenskap tot stand te bring.
Dit is deur haar toedoen dat die Baldinelli-mosaïek aan die buitemuur pryk. Hierdie kunswerk is in 1981 deur die destydse Sukovs aan die biblioteek geskenk. In haar verwelkomingswoorde het die huidige bibliotekaris, me. Gretchen Gerber, die belangrike en ondersteunende rol van die Phumelela-munisipaliteit beklemtoon. Gerber het bevestig die goeie gesindheid van die munisipaliteit dra grootliks tot die instandhouding van die biblioteek as inligtingsbaken by.
Gerber het met lof van die vorige bibliotekarisse, mes. Greta Bruwer ( 1981 tot 1987), Rika Marais en Lida van Zyl, gepraat. Marais het in 1999 afgetree en woon nou in Bloemfontein. Van Zyl was 15 jaar by die Vrede-biblioteek betrokke. Almal is geliefde mense – bekend aan oud en jonk op Vrede.
Die goeie spanwerk en samewerking met die distriksbiblioteekdiens onder leiding van me. Ilse Craven beteken baie vir die gemeenskap van Vrede, het Gerber gesê. Mnr. Josie Ralebenya, direkteur: koöperatiewe dienste van die Phumelela-munisipaliteit, het die belangrike rol wat rekenaars in die opvoeding van die jeug van die gemeenskap speel, beklemtoon.
Die Vrede-biblioteek het nou rekenaars om leerlinge met skoolverwante take te ondersteun. Die biblioteek se rol as poort tot tegnologie en inligting is deur Ralebenya geprys.
- Volksblad