Ambisieuse sjef ryg medaljes in

BETHULIE. – Wanneer jy Eduan Pretorius vra wat hy ná skool wil doen, hoor jy dadelik: “Ek wil ’n sjef word”. Al is hy net in gr. 7, stel hy reeds sy visier daarop om eendag na ’n sjefskool te gaan.

Eduan, ’n leerling aan die Landbouskool Hendrik Potgieter op Reddersburg, het in 2009 sy kleure verwerf en lid van die Vrystaatse junior jeugskouspan geword. Hy is vanjaar weer ’n spanlid en spog met vyf medaljes wat hy in die suiwelafdeling gewen het – vier goud en een silwer.

Nadat hy slegs ’n jaar gelede die eerste keer aan ’n kompetisie deelgeneem het waarin hy ’n tweede plek verower het in die tuisnywerheidsafdeling het hy oorgeskuif na die suiwelafdeling waar hy skoonskip gemaak het.

In die nasionale kompetisie op Magaliesburg het hy tweede in sy ouderdomsgroep in die land geëindig. Hy het goue medaljes op die Boertjiefees op Bultfontein, die Boeredag-jeugskou op Reddersburg en die Vrystaatse kampioenskappe wat op Kroonstad gehou is, asook op Vryburg, gewen.

In laasgenoemde kompetisie het hy ook weggestap met die trofee vir die beste drinkjogurt, gewone jogurt en maas en op Magaliesburg met ’n toekenning vir die naasbeste tafel.

Eduan het in 2009 erekleure by sy skool ontvang vir suiwelbereiding, ’n vak wat hy buitemuurs neem.

Op 4 September het hy weer in die suiwelafdeling op die Boertjiefees op Bultfontein deelgeneem en van 21 tot 24 September aan die junior nasionale kampioenskappe by Morgenzon, Mpumalanga.

Hy is reeds ’n entrepreneur van formaat en help om die koste vir deelname aan die kompetisies te finansier deur sy tuisgemaakte produkte te bemark en verkoop.

Kopers kan tussen die “wêreld se gevaarlikste sjokoladekoek” in ’n koppie, ’n geskenkpakkie, souspoeier en braaisout kies.
Hy vertel hy oefen hard en kan nie voorbly nie, omdat sy susters graag sy produkte eet.

Eduan is die jongste seun van advv. Theo en Marinda Pretorius. Laasgenoemde is landdros op Bethulie.