Storm om referendum oor UV-leuse

Moet God se naam uit Kovsies se leuse weggelaat word?

Dit is die vraag wat AfriForum verlede week in ’n referendum oor dié onderwerp aan studente van die Universiteit van die Vrystaat (UV) gestel het.

Die opname is onder studente by die mediese kafeteria, sowel as by koshuise, gedoen.

Volgens die opname het 93,2% van die respondente aangedui dat hulle nie met die leuseverandering saamstem nie.

Volgens AfriForum is die opname gedoen in die lig daarvan dat die UV-bestuur dié besluit geneem het nadat hy die verteenwoordigende studenteraad (VSR) verlede jaar ontbind het ?en ?studente ?wat nie deur die studentegemeenskap verkies is nie in die plek van die VSR aangestel het.

Dit het tot gevolg gehad dat die besluit oor die vakansie deurgevoer is sonder enige konsultasie met studenteverteenwoordigers.

AfriForum-Jeug het beplan om ’n omvattende referendum op die kampus te doen, maar het dit afgeskaal nadat hulle deur die UV-bestuur verbied is om die gevoel van die studente deur ’n wetenskaplike meningspeiling te toets.

Die respondente was breedweg verteenwoordigend van die UV se demografie wat ras, geslag, fakulteite, koshuise en dagstudente betref. Altesaam 44% van die respondente is swart en 56% is wit. Uit die respondente is 47% dames en 53% is mans.

Verskeie maatreëls is ingestel om te verseker dat die stemproses regverdig plaasvind. Studente moes onder meer hul studentenommers en kontakbesonderhede invul om te bevestig dat hulle wel studente van die universiteit is en stembusse is deurentyd verseël.

Me. Nikke Strydom, AfriForum-Jeug se woordvoerder, sê ’n universiteit is meer as net ’n plek om te studeer. Tradisie en trots is ook belangrik en ’n universiteit se leuse is deel hiervan.

Volgens Strydom kan geen besluite by ’n universiteit sonder die studente se insette geneem word nie, aangesien studente die hartklop van ’n universiteit is.

AfriForum eis dus dat die universteit na aanleiding van die uitslag van die opname hul besluit sal hersien.
Mnr. Rudi Buys, studentedekaan, het aan Volksblad gesê die UV keer nie die werkwyse en uitslag van die opname goed nie. Hy het gesê dit is “onverantwoordelik en onwetenskaplik”.

Volgens Buys is “daar geen manier waarop die geldigheid en betroubaarheid van die ‘referendum’ getoets kan word nie. Daar is ook geen bewyse dat etiese en vertroulikheidsklousules vir die opnames gevolg is nie.”

Buys het ook aan Volksblad gesê dat die UV nie sal huiwer om regstappe teen enige organisasie te doen wat die integriteit en waardigheid van sy studente bedreig of net studente wil misbruik om verskuilde agendas te bevorder nie.

Mnr. Ernst Roets, voorsitter van AfriForum-Jeug, het egter in ’n nuusverklaring gesê Buys ondermyn demokrasie op dié kampus deur op outokratiese wyse die vrye wisseling van menings deur studente te verbied en deur studenteverenigings wat van hom verskil te dreig dat hulle tot verbode organisasies op kampus verklaar sal word.

Met verwysing na Buys se pogings om die uitslag van die meningspeiling te bevraagteken het Roets gesê indien die UV eerlik is met pogings om die uitslag van die peiling verkeerd te bewys, sal die UV ’n amptelike referendum oor die saak uitroep om te wys waar studente se sentimente lê.