Pas meer geduld op die pad toe
2011-05-17 10:30
- Artikelopsies
- Deel
- Kry Volksblad op
JY sit rustig en wag vir die rooi verkeerslig om na groen oor te slaan sodat jy kan ry. Doef! Jy hoor net een reuse-slag en voel die slag van agter af.
Iemand het van agter teen jou kar vasgery. Net omdat hy te ongeduldig was om net nog tien sekondes te wag.
Hy het verby ’n ander kar gejaag en teen jou motor vasgery.
Die skade aan jou (onskuldige) kar beloop derduisende rande. Alles onnodig.
Ongelukke gebeur so gou, maar nou vra ek hoekom is ons so ongeduldig as ons bestuur? Jy gaan eindelik ook jou bestemming bereik. As die verkeerslig rooi is, is hy rooi. Dus moet jy stop.
As jy besluit jy stop nie by ’n rooi verkeerslig nie, sal jy natuurlik mos ’n ongeluk veroorsaak. Dis nog nie jou beurt om te ry nie, so wag maar net nog ’n minuut. Wat maak jou dan nou soveel beter as die bestuurder agter jou dat jý oor die verkeerslig mag jaag? Padreëls is daar om ’n rede.
Nog iets wat baie ongelukke veroorsaak, is spoed. Dit sal lekker wees om 100km/h in die stad te ry, maar jy mag nie. So hoekom sal ek nou ander se lewe in gevaar stel sodat ek die jaagduiwel binne my kan bevredig? Dis net nie reg nie.
As mense net ’n bietjie verantwoordeliker en geduldiger begin bestuur, sal die padsterftes ook afneem.
Dit is soms moeilik om koel en kalm te bly as ’n minibus-taxi voor jou insny. Die Christen binne jou word dan beproef. Dit verg baie selfbeheersing om nie dan vingertaal te praat nie.
Ek maak niemand sleg nie, maar al wat ek vra, is dat ons net ’n bietjie meer geduld moet hê as ons bestuur. Onthou Speed kills. Arrive Alive.
Veilig ry!
- Volksblad