‘Musiek kan die wêreld verander’
2010-03-09 13:53
- Artikelopsies
- Deel
- Kry Volksblad op
“Music can change the world because it can change people.” Dit was die woorde van Bono van die Ierse rockgroep U2.
Dit is presies met dié gesindheid dat plaaslike kunstenaars eersdaags hul talente saamspan om geld vir die Blue Butterfly Foundation tydens die musiekfees Bril Fest in te samel.
Die Blue Butterfly Foundation is gestig om te help met Jaco Steenbergen se mediese koste nadat hy in November 2009 ’n elektriese skok in ’n fratsongeluk opgedoen het.
Bril Fest is ’n eendag-musiekfees wat beloof om ’n hoendervel-ervaring te wees.
Die kunstenaars wat gaan optree, is Retrospeksie, Apeklap, Kinders van Vandag, Chidori, Audio Nebula, Oros in ’n lang glas, Vrede Verslaaf, Colour Blind en Dirk Hanekom. Indien die fees genoeg ondersteuning kry, beoog die organiseerders om die fees een keer per kwartaal te hou.
Die fees was die geesteskind van Sean met die Bril en Paul Carter wat oor al die jare van saam musiek maak heen nog altyd geweet het musiek kan die wêreld verander. Die twee beskou Bril Fest as die perfekte geleentheid om dié teorie te bewys.
Sean met die Bril het ’n liedjie, Gee my jou hand, spesiaal vir Jaco geskryf, en dit saam met al die kunstenaars wat by die fees optree, opgeneem. Die liedjie kan gratis by www.brilfest.co.za afgelaai word.