Meeste nog vang graad by UV
2011-05-17 10:30
GESKIEDENIS is op vanjaar se herfsgradeplegtigheid van die Universiteit van die Vrystaat (UV) gemaak deurdat die meeste kwalifikasies nog toegeken is.
Altesaam 3674 kwalifikasies is toegeken. Dit sluit 629 diplomas, 2613 baccalaureus- en honneursgrade, 372 meestersgrade en 58 doktorsgrade in.
Graduandi het voor die plegtighede in ’n tent aan die onderkant van die hoofgebou se grasperk bymekaargekom waarna hulle na die Callie Human-sentrum, waar die grade oorhandig is, gestap het.
Volgens mev. Lacea Loader, UV-woordvoerder, was die doel hiervan om die plegtigheid sigbaarder vir studente te maak. Die formaat van die plegtigheid het ook verder verander met die meesters- en doktorsgrade van elke fakulteit wat op een seremonie toegeken is in plaas daarvan dat elke fakulteit dié kwalifikasies individueel hanteer.
Al ses plegtighede het op dieselfde wyse verloop met me. Shéri Brynard, ’n Downsindroom-lyer, wat as gasspreker die graduandi aangemoedig het om niks in hul pad te laat staan om hul drome te bewaarheid nie. Sy het gesê dit is in elkeen se mag om beheer te neem oor sy of haar eie lewe.
Vir Shéri en haar gesin was dit ook om ander redes ’n besonderse geleentheid. Haar sussie Suzette het die graad B.Sc. verwerf en haar ma, dr. Susette Brynard van die UV se Skool vir Opvoedkunde-studie, was promotor vir ’n doktorsgraad wat toegeken is. Haar pa, Jerry, was jare lank aan die UV verbonde. Hy is reeds oorlede.
DW Bester, ’n Rhodes-beurshouer van Kovsies, het nie net die geleentheid gekry om die graduandi en die gehoor op elke herfsgradeplegtigheidsessie toe te spreek nie, maar is ook met ’n senaats- en dekaansmedalje vereer. Laasgenoemde is aan hom oorhandig as eerbewys vir sy eerste plek in die fakulteit natuur- en landbouwetenskappe, wat hy met mnr. Ryan Eric Lamb deel.
DW werk nou as navorser by die Reserwebank in Pretoria.
Dié werkgeleentheid is ’n uitvloeisel van die beurs wat hy gekry het.
Verskeie kinders van UV-personeel het ook op dié gradeplegtigheid hul grade ontvang.
Marthinus Ras, seun van mnr. Jan Ras, ’n dosent aan die departement argitektuur, het ’n B.Com.-graad in rekeningkunde ontvang.
Hannerie Hay, dogter van prof. Driekie Hay, vise-rektor: akademies, het ’n graad in B.Com.-regte ontvang.
Wessel van Zyl, seun van prof. Gert van Zyl, dekaan van die fakulteit gesondheidswetenskappe, het ’n graad in B.Com.-rekeningkunde ontvang.
Leandré Wilken, dogter van mev. Tertia Wilken van Xerox op die hoofkampus, het die graad B.Ed. in voorskoolse en laerskoolonderwys ontvang.
Sandra Venter, dogter van mnr. Nick Venter, adjunkdirekteur van studente- akademiese dienste, het die graad B.Soc.Sc. (verpleegkunde) ontvang.
- Volksblad