Kagiso verras met eerste plek op sêr

KAGISO skitter toe met ’n eerste oorwinning op Stagedoor!

Dat Trei Tekateka, primarius en ook afrigter van Kagiso, sprakeloos was toe hul naam as wenners van die mansafdeling in die sêr-eindronde uitgeroep is, is te verstane.

Roosmaryn het die eerste plek onder die dameskoshuise verower.

“We used to be down in the slumps on campus, and now we are here slugging it out with the big dogs!” het Trei oorstelp gesê.

Nie een van die gewone groot kanonne, wat gewoonlik die sêr-titels opraap, soos Veritas, Sonnedou, Marjolein of JBM, kon ’n eerste plek in vanjaar se algehele kompetisie behaal nie.

Die tema van vanjaar se Stagedoor was If only, wat ironies ingepas het by gebeure wat Stagedoor voorafgegaan het.
Op ’n sitting van die studenteparlement, vier dae voor die sêr-rotasies, wou Sasco die reëls van Stagedoor verander.

Die VF+-Kovsies en die DA het daarteen gestem. ’n Amptelike dokument, onderteken deur alle HK’s vir kultuur op kampus, waarin almal saamstem met die reëls en kriteria van Stagedoor 2010, is op die sitting voorgehou. Sasco het dié dokument verwerp.

Die kriteria waaraan koshuise moes voldoen vir Stagedoor was sang 20%, atmosfeer 30%, produksie 40%, algeheel 10%.
Verlede Dinsdagaand was ’n nat en reënerige sêrrotasie vir die mans.

Heimat, wat amper uit Stagedoor geskop is, het wel deelgeneem, maar nie die eindronde gehaal nie.

Die Woensdagaand was dit die vroue se beurt om te roteer. Met albei aande was vroue- en mans-gazellies stampvol.
Net ses vroue- en vyf manshuise kon tot die eindronde deurdring.

Onder die vroue het Marjolein, N.J. van der Merwe, Roosmaryn, Soetdoring, Sonnedou en Wag-’n-Bietjie deurgedring, en Armentum, JBM, Kagiso, Kayalami en Veritas het die mans se naam hoog gehou.

Die eindronde is Vrydagaand in die Kovsiekerk se ouditorium gehou.

Johrné van Huyssteen, voorsanger van ddisselblom, was vanjaar die aanbieder van die eindronde. Aangesien dit sy verjaardag was, het die UV se SR vir kultuur, Iselma Kruger, hom gelukgewens.

Sy het soos ’n wafferse Marilyn Monroe destyds vir pres. J.F. Kennedy op sy verjaardag gesing het, vir Johrné gesing.
Die Stellenbosse groep Kaleidoskoop het die gehoor vermaak terwyl die uitslae verwerk is.

Die volledige uitslae is soos volg:
Algehele wenners:
1ste: Roosmaryn (vroue); Kagiso (mans)
2de: Marjolein (vroue); JBM (mans)
3de: Sonnedou (vroue); Veritas (mans)
Beste verweking: Marjolein (vroue) en JBM (mans)
Beste ontvangs: Emily Hobhouse (vroue) en JBM (mans).

Kagiso se drama en danspassies, wat vir hulle ’n eerste plek verseker het in hul eerste Stagedoor-eindronde, het ’n splinternuwe dimensie na Stagedoor gebring.

Kampus-kwessies van die tyd is in byna al die sêr-optredes in die eindronde aangeraak. Dit sluit in die bonde wat gesluit is, en eerstejaars wat hul skootrekenaars soek, maar steeds nie kry nie...

Armentum het op humoristiese en gepaste wyse met die If only-tema baie oor die skootrekenaars te sê gehad.

Koshuise soos Sonnedou en Veritas het weer op hul beurt die kwessies van die bonde met die tong in die kies opgehaal.
Roosmaryn was, net soos Kagiso, oorweldig deur hul eerste plek.

Jaco Griessel, wat ’n graad in drama het en nou ’n derdejaar-musiekstudent is, het hul verwerkings gedoen. Mieke du Plessis, die groep se hoofafrigter, het net trane van vreugde gehad.

Hannelise de Villiers, Roosmaryn se HK vir kultuur en derdejaarstudent in B.Rek, het gesê: “Ons het van die begin af glad nie gefokus op wen nie, maar net om dit te geniet, want op die ou end is dit waaroor Stagedoor gaan.

“Die Here het ons net geseën met so ’n groep talentvolle mense.”