Boesemvriende cum ook saam-saam taai graad

Onder die baie “spesiale” graadtoekennings verlede week was dié van twee aktuariële studente wat van gr. 8 af hegte vriende is.

D.W. Bester en Stefan Britz het verlede ?jaar ?die ?graad ?B.Sc. Aktuarieel nie net voltooi nie, maar ook gecum.

D.W. was ook die beste Baccalaureus-graadstudent in sy finale jaar in die fakulteit natuur- en landbouwetenskappe waarvoor hy die dekaansmedalje ontvang het, en die beste Baccalaureus-student aan Kovsies waarvoor hy die senaatsmedalje ontvang het.

Stefan en D.W. het mekaar op laerskool in die Nautilus-wiskundeprogram leer ken, “maar toe het ons nie baie van mekaar gehou nie”, spot hulle.

D.W. was in die Laerskool Fichardtpark en Stefan in Tjokkies (Laerskool Universitas).

Hul vriendskap is gesmee toe albei na die Hoërskool Jim Fouché is waar hulle mekaar in wiskunde, addisionele wiskunde en wetenskap opgedreun het.

Albei het in matriek op ’n toekoms as aktuarisse besluit en om aan die UV te studeer.

Vir afleiding van hul veeleisende studies het hulle met die Koreaanse krygskuns haedong begin. Albei het verskeie medaljes op die Suid-Afrikaanse kampioenskapbyeenkomste behaal en verlede jaar ’n swart gordel. Nog ’n sportsoort wat hulle saam-saam op universiteit begin speel het, is bofbal. Elke Saterdagmiddag sal jy sien hoe hulle saam met dosente en studente van die departement aktuarieel en wiskundige statistiek op een van die universiteit se rugbyvelde hulle soos Amerikaanse bofbalspelers gedra.

Stefan en D.W. se toekomsvisie het begin vanjaar effens uiteengeloop. D.W. sien steeds kans vir die lang en moeilike pad na dié van aktuaris, dus doen hy vanjaar honneurs in aktuarieel.

Stefan sê hy hou nie van die sakewêreld nie, hy verkies wiskunde en is vanjaar ingeskryf vir honneurs in wiskundige statistiek.

As die lewe verloop soos die twee vriende in gedagte het, sal hulle nog geruime tyd studente aan Kovsies wees en hulle ?nog beter in haedong bekwaam.

En as hulle dalk eendag in dieselfde stad werk, wil hulle ’n haedong-skool open.

Stefan se ander groot liefde is musiek – hy speel drumkit in ’n band.
 

- Volksblad