Vir klassieke fynproewers

VIR GRIEKSE FLUITE

deur W.J. Henderson. Protea-boekhuis. Sagteband. R250.

W.J. Henderson, emeritus-professor in Grieks en Latynse studie aan die Universiteit van Johannesburg het in hierdie boek die vroeë Griekse elegiese poësie uit die oorspronklike Grieks vertaal. Hy bespreek in diepte die afsonderlike digters se werke en plaas dit geheel in konteks van die maatskaplike en letterkundige omstandighede.

Dit het hy reeds in 1983 tydens sy navorsing in Italië gedoen, maar in die daaropvolgende jare die vertalings, referate en vele artikels rondom hierdie studie verfyn en hersien tot hierdie briljante werk. In die oorspronklike tekste het hy na drie aspekte gekyk, nl. die digter se eie credo, enige aanduiding van die voordrag, of aanbiedingsgeleentheid van die gedig, en laastens na die digter se individualiteit. Hierdeur kon die skrywer dit in konteks plaas en sin aan die gedig in sy geheel gee.

Die leser wat geen of min kennis het van die antieke Griekse literatuur gaan die boek nie so baie geniet soos iemand wat wel oor die kennis beskik nie. Tog is dit interessante leesstof wat ’n dieper blik gee op die sosiale lewe, oorlogvoering, die geskiedenis, aanbieding en plek van die digkuns en digter in die antieke tyd. Tereg sê die skrywer in die voorwoord: “Die teikengehoor is steeds die klassikus, die literatuurwetenskaplike wat veral op genre fokus en die gevorderde student in klassieke of vergelykende literatuur. Indien die gewone leser dit ook geniet of baat daarby vind, is dit ’n bonus.”

– Stefnie Cilliers, vryskutresensent en skrywer

- Volksblad