KOOK EN GENIET deur S.J.A. de Villiers. Human &
Rousseau. Hardeband. R275.
Wat is ’n huis sonder ’n moeder, vra die kitch muurversiering in ou
huise. Maar wat is ’n huis sonder Kook en geniet?
’n Nuwe volledig hersiene Kook en geniet het onlangs verskyn. Die
eerste uitgawe is in 1951 gepubliseer en dit het die klassieke Suid-Afrikaanse
kookboek geword.
Hoewel nie so kleurvol soos hedendaagse kookboeke nie, is Kook en geniet
’n staatmaker wat jou als van kook leer.
Wil jy iets nuuts leer, kan jy maar hierin gaan blaai. Kan jy nie
’n eier bak nie? Kyk op bl. 43. Wil jy kreef gaarmaak? Op bl. 116 word
verduidelik hoe jy dit doen.
Daar is ander nuttige wenke soos dié vir plaasvervangers, bv. as jy
nie bruismeel het nie, neem 250 ml meelblom en voeg 7,5 ml bakpoeier by. Daar is
’n omskakelingstabel van gram na milliliter vir dié van ons sonder ’n
kombuisskaal, lyste van watter vrugte wanneer beskikbaar is en hoe om dié vrugte
te gebruik. Die inleiding bevat inligting oor goeie voeding en die samestelling
van maaltye waarna lyste met spyskaarte en algemene beginsels vir die kombuis
en kosmaak volg.
Dan is daar nog die talle resepte. My gunsteling-semelbeskuitresep
(dit flop nooit) het van bladsynommer verander en voorstelle bygekry. Jy kan nou
ook hawermout en neute byvoeg pleks van net semels en sonneblomsade.
Die beste van als is jy het die meeste bestanddele vir hierdie
resepte reeds in die koskas.
Dis ’n kookboek sonder frille en pretensies, maar ’n huis (veral
waar ’n jong bruid woon) sonder Kook en geniet is soos ’n huis sonder ’n
moeder.
– Adéle Dempers