Leer van sokker

SOKKER – ALLES WAT JY WIL WEET MAAR TE SKAAM IS OM TE VRA deur Tim Sandham. Lapa-uitgewers. Sagteband. R60.

“Sokker is baie meer as net ’n sportsoort. Dit is ’n kultuurverskynsel. Dit is ’n fenomeen. Dit is ’n krag oor landsgrense heen. Moord is gepleeg en oorlog verklaar weens sokker.”

So begin die dunnerige, maar nuttige boekie wat jou ’n basiese kennis van sokker sal gee. Ongelukkig weet baie Afrikaanssprekendes nie veel van sokker nie, maar hierdie boekie is ’n bekostigbare moet as jy oor die groot sokker van 2010 wil saamgesels.

Die boek begin met ’n bondige geskiedenis van sokker en dan volg kort brokkies inligting. Die reëls van die spel, posisies en spanformasies word bespreek, en daar is ’n lys van sokkerlegendes en name wat jy moet ken as jy in wil wees. Die leser word bekend gestel aan die dinge wat sokker in die nuus hou – die astronomiese salarisse, omstrede doele en die vroue agter die superster-spelers. ’n Hoofstuk word aan Bafana-Bafana afgestaan. Daar is ook ’n 16-blad-aktiwiteitsboek vir kinders. Hoewel die boek beslis nie ’n handboek vir die sokkerkenner is nie, is dit leersaam en prettig vir iemand wat net ’n gangbare kennis van sokker wil opbou.

Wen! Wen! Wen!

’n LESER kan hierdie boek wen. Stuur ’n SMS na 41849 (tik eers “Wen Sokker”, jou naam en posadres).? SMS’e kos R2. Die kompetisie sluit vandag om 22:00.

• Verlede week se wenners is mevv. K. van Loggerenberg van Kroonstad en A. du Plessis van Odendaalsrus.