DIE REëN KOM NIE MAKLIK NIE – STORIES VAN AGTER
DIE SOUTPANSBERG deur Ina le Roux. Human & Rousseau. Sagteband. Prys
R145.
Dis om in ’n ander mens se hart in te klim, die lees van die
verhale wat Piet Mavhetha in sy eie Afrikaans vertel. Teen die agtergrond van
die historiese werklikhede van die land.
Jy voel die swaarkry en armoede van die seuntjie wat agter die
Soutpansberge in een van die droë dele van die land grootword. Jy is saam
verwonderd oor die wonderwerke wat hy deur die jare beleef. Jy lag saam oor die
snaakse voorvalle in sy lewe.
Die verhaal ontvou van dié nederige Venda-man wat as tienerseun in
die laat jare vyftig deur armoedige huislike omstandighede gedwing word om ’n
wit paartjie se seuntjie te gaan oppas. So verknog raak Johantjie aan Piet dat
hy weier om Kersfees saam met sy ouers by familie te gaan kuier as Piet nie
saamgaan nie.
In 1961 gaan Piet saam met die gesin Krugerwildtuin toe – waar die
hekwagte hom nie wil inlaat nie omdat hy swart is. Piet se reaksie: “O, nou
wonder ek, dalk is daar ’n muskiet of ding wat my sal steek of so!”
Later kom Piet tot bekering nadat ’n vriend hom van die Here
vertel. Piet gaan Bybelskool toe en word ’n pastoor in die arm gehuggie waar hy
grootgeword het.
Die boek gaan grootliks oor sy belewenisse as pastoor, vertel in
Piet se eie woorde.
In die proses ontvou die karakter van hierdie minsame,
beginselvaste, nederige mens met sy mooi humorsin voor jou.
Piet wat nee sê toe die ANC voor die 1994-verkiesing ’n vergadering
in die kerk wil hou, en daarna twee weke lank vrees dat sy huis of die kerk
afgebrand sal word. “Die kerk kan hulle nie kry nie, dis die Here se
kerk.”
Piet wat by meer as een geleentheid nee sê vir ander
werksaanbiedinge. Oor ’n aanbod om as skuldinvorderaar vir ’n meubelsaak te
werk, sê Piet: “Netnou as ek so soek en soek na die mense op daardie list sal ek kry
ek het God lankal verloor.”
Piet wat ’n skoolmeisie wat groot potensiaal het, maar nie deur
haar ouers die kans gegun word om skool te gaan en ontwikkel nie, in sy huis
inneem en vir haar skoolopleiding betaal.
Piet klim in jou hart in. Sy waarnemings van die lewe, sy humor, sy
omgee.
Hierdie boek is ’n juweel. Ina le Roux slaag op merkwaardige wyse
daarin om as skrywer onsigbaar te raak in die vertellinge, en om Piet so eg aan
die woord te laat dat dit sý boek en sý verhaal word. Dit is meesterlik
gedoen.
’n Boek wat ’n mens opnuut laat besef hoe ryk hierdie land is aan
wonderlike mense met wonderlike verhale. ’n Boek wat ’n mens opnuut met hoop
besiel.
– Christo van Staden, redaksielid van Volksblad